რა ვიცით ტერორისტების შესახებ და როგორ უნდა ამოვიცნოთ ისინი
ტერორიზმი, ისევე როგორც ექსტრემიზმი, არასამართლებრივი მოვლენაა. მაგრამ სხვა დანაშაულებისგან იგი განსხვავდება რიგი მახასიათებლებით. ტერმინ „ტერორიზმს“ აქვს დიდი რაოდენობით დეფინიცია, რომელთაგან თითოეული შეიძლება სადავო გახდეს და ფართო მნიშვნელობა მიიღოს კონტექსტიდან გამომდინარე.
Penal Reform International–ის (ციხის საერთაშორისო რეფორმა) მიერ ცენტრალურ აზიაში ჩატარებულ კვლევაში წარმოდგენილია თვითმკვლელ ტერორისტთა კლასიფიკაცია, რომლებიც, მათი ტიპების მიხედვით, ჩვეულებრივი ადამიანისგან შეიძლება განვასხვავოთ მათი ქცევით, მიმიკით და ლაპარაკით.
ტერორისტი „ზომბი“
ზომბირება (ფსიქოპროგრამირება) ნიშნავს ადამიანის ფსიქოლოგიურ დამუშავებას (ჰიპნოზისა და ფსიქოტროპული ნივთიერებების გამოყენებით), რომლის პროცესში იგი იღებს კონკრეტული ქმედების - ტერორისტული აქტის ჩადენის მითითებას. ადამიანი არ აცნობიერებს, თუ რას აკეთებს და რა ემართება მას. ზომბირებას შეიძლება დაექვემდებარონ როგორც ფსიქიკურად ჯანმრთელი პირები, ასევე სხვადასხვა სახის ფსიქიკური დაავადებების მქონე მოქალაქეები.
ქცევის განმასხვავებელი ნიშნებია: გულგრილი „გაყინული“ (უსიცოცხლო) სახე, უაზრო გამოხედვა, ერთფეროვანი მოძრაობები, არაფრის გამომხატველი ჟესტიკულაცია, სხვა ადამიანებთან კონტაქტების არ არსებობა ან შემთხვევითი კონტაქტები. გაუთვალისწინებელი დაბრკოლების წარმოქმნისას „ზომბი“ იბნევა და თითქოს სხვისგან ეძებს მხარდაჭერას.
„პატრიოტი“ ტერორისტი (რწმენისთვის მებრძოლი)
ეს ყველაზე გავრცელებული ტიპია. გამოცდილი ინსტრუქტორების ზემოქმედებით უყალიბდებათ თავისი სარწმუნოებისა და იდეების ფანატიკური რწმენა. „პატრიოტის“ აღქმაში მტრის სახეს შეადგენენ სხვა რწმენის, ეროვნების წარმომადგენლები. ტერაქტის ჩადენა აღიქმება როგორც „წმინდა ომი“ „ურწმუნოთა“ წინააღმდეგ, როგორც გმირობა სარწმუნოებისათვის ან საკუთარი ხალხის განთავისუფლებისთვის. იგი აცნობიერებს, რომ ის ტერორისტულ აქტს ახორციელებს, კლავს ხალხს და ანადგურებს ქონებას, და მას სურს ეს შედეგები. ის დანაშაულზე მიდის პირდაპირი განზრახვით და დარწმუნებულია თავის სიმართლეში.
ქცევის განმასხვავებელი ნიშნებია: ასეთი ტერორისტის გაჩერებისას დოკუმენტების შემოწმების ან საუბრის მიზნით შეიძლება შეინიშნებოდეს: ემოციური დაძაბულობისა და მტრული დამოკიდებულების ზრდა, პირქუში და მუქარის გამომხატველი მზერა, მჭიდროდ მოკუმული ტუჩები, კბილების ჭრაჭუნი, თვალის შევიწროებული გუგები, გახშირებული სუნთქვა, მუშტად შეკრული ხელები. შეკითხვებს პასუხობს მკვეთრად მოკლე პაუზის შემდეგ, პასუხებში აშკარად უხეშობა იგრძნობა. ასეთი ტერორისტის განეიტრალების მოუხერხებელი მცდელობის შედეგები შეიძლება არაპროგნოზირებადი აღმოჩნდეს. მზად უნდა იყოთ ტერორისტის გასანეიტრალებლად აგრესიული აფეთქების დაწყებამდე.
ფულით მოსტიდული ტერორისტი
მიდის ტერორისტული აქტის მოწყობაზე ანგარების მიზნით (ასრულებს იმ ადამიანთა დავალებას, ვისზეც მთლიანად არის დამოკიდებული ან უკიდურეს გაჭირვებაში იმყოფება და ცდილობს ოჯახის მატერიალურად უზრუნველყოფას). ასეთი ტერორისტი ხასიათდება იდეოლოგიური მოტივების არარსებობით.
ქცევის განმასხვავებელი ნიშნებია: შინაგანი დაძაბულობა, ნერვიულობა, რომელიც მატულობს, როდესაც რაიმე დაბრკოლება გამოჩნდება მის გზაზე. მოუსვენრობა, ირგვლივ ყურება, პოზის ხშირი ცვლილებები, ტანსაცმლის, ჩანთის სახელურის ან ქამრის ნერვული წეწვა.
საუბრისთვის დაკავებისას შეიძლება შეიმჩნეოდეს შემდეგი ნიშნები: სახის ფერის შეცვლა, ოფლიანობის გახშირება, თვალების ხშირი ხამხამი, ხველა, სახის გარკვეული ნაწილების ატოკება, პირის მიმიკის გაძლიერება, ტუჩების გახშირებული მოლოკვა ან ნერწყვის გადაყლაპვა. ხმის ტემბრი ხშირად მაღალია, საუბარი სწრაფი და წყვეტილი, შეიძლება შეინიშნებოდეს ხმის სპაზმები. გადაჭარბებულმა შფოთვამ და ღელვამ შეიძლება გამოიწვიოს ნერვული მოშლა.
უნებლიე ტერორისტი
ადამიანს ტერორისტული ქმედებისკენ შეიძლება აიძულონ შანტაჟის გზით (ოჯახის წევრების მძევლად აყვანა, ნებისმიერი დისკრედიტირებული ინფორმაციის გამჟღავნების მუქარით). ანდა შარიათის სასამართლოს გადაწყვეტილებით დანაშაულის ჩადენის გამო (ღრმად რელიგიურ ადამიანს ამ გზით აიძულებენ ღმერთის წინაშე დანაშაულის გამოსყიდვას).
ქცევის განმასხვავებელი ნიშნებია: პირქუში, ფერმკრთალი, ავადმყოფური სახე, შეცვლილი გუნება-განწყობა, შენელებული მოძრაობები, არაფრის გამომხატველი ჟესტიკულაცია. ის ჩუმად არის, ჩაფლულია საკუთარ აზრებში, გულგრილია გარშემო მყოფი ადამიანების და განვითარებული მოვლენების მიმართ. საუბრის დროს არ უყურებს თანამოსაუბრეს სახეში, ერიდება თვალებით კონტაქტს, ხმა ჩვეულებრივ დახშულია, მეტყველება შენელებული, დასმულ კითხვაზე პასუხის გაცემამდე შეიძლება შეინიშნებოდეს დიდი პაუზები.
ტერორისტი მანიაკი (რომელსაც ბოდვითი იდეები აქვს)
განსაკუთრებით ხშირად მარტოხელა ტერორისტია ის, ვინც განიცდის სხვადასხვა სახის ფსიქიკურ აშლილობებს (თავის ქალა-ტვინის ტრავმის, თავის ტვინის დაავადებების, ნარკოტიკების და ალკოჰოლის მოხმარების შედეგი). ფსიქოპათოლოგიური თავისებურებებისა და აკვიატებული იდეებიდან გამომდინარე, მასს სურს დიდება ნებისმიერ ფასად, სურს გაანადგუროს მტრები, რომლებიც მას დევნიან, ან გარდაქმნას ქვეყანა. ასეთი ტერორისტი განსაკუთრებით საშიშია, თუ მისი ცნობიერებით ოსტატურად მანიპულირებს რომელიმე ტერორისტული და ექსტრემისტული ორგანიზაცია.
ქცევის განმასხვავებელი ნიშნებია: გულჩათხრობილობა, გაუწონასწორება, განწყობის უეცარი ცვალებადობა, გაღიზიანება და აგრესიულობა, ისტერიულობა, მოუსვენრობა მოძრაობებში ან სიტყვებში. შეიძლება აღინიშნებოდეს ჭირვეულობის, წყენის ნიშნები, ასევე შთაბეჭდილების მოხდენის სურვილი, ეგოიზმის ნიშნები. დაკავების მცდელობისას, ის ჩვეულებრივ არ უწევს სასტიკ წინააღმდეგობას.
Комментариев нет:
Отправить комментарий
Will be revised