https://www.unep.org/ru/novosti-i-istorii/istoriya/kak-industriya-videoigr-prisoedinyaetsya-k-borbe-za-spasenie-planety
როგორ უერთდება ვიდეო თამაშების ინდუსტრია პლანეტის გადასარჩენად ბრძოლას
როდესაც 2019 წლის დეკემბერში ავსტრალიაში ტყის ხანძრები მძვინვარებდა, Space Ape ვიდეო თამაშების მოთამაშეებმა დახმარების გაწევის წინადადებით მიმართეს მათ შემქმნელ კომპანიას. ლონდონის ფირმამ სწრაფად ჩადო შიდა თამაშების შესყიდვები მის რამდენიმე მობილურ თამაშში, და მთელი შემოსავალი გადასცა ველური ბუნების დასაცავად ან ჰუმანიტარულ საქველმოქმედო ორგანიზაციას, რომელიც მოქმედებს ამ ტერიტორიაზე.
სულ რაღაც ოთხ დღეში კომპანიამ 120 000 დოლარი შეაგროვა.
„ეს გვიჩვენებს, თუ რამდენად სურთ ადამიანებს სიკეთის კეთება“, - თქვა დებორა მენსა-ბონსუმ, Space Ape Games-ის კონტენტის შექმნის განყოფილების ყოფილმა ხელმძღვანელმა, რომელიც ახლა მართავს საკუთარ კონსულტინგურ კომპანიას. მისი კომპანია ორიენტირებულია თამაშების გამოყენებაზე სოციალური ზემოქმედებისთვის.
ახლა ვიდეო თამაშების ინდუსტრია მზადაა ხელებდაკაპიწებულმა უფრო მეტი გააკეთოს ჩვენი პლანეტისთვის. 2020 წლის აგვისტოში, მობილური თამაშების შემქმნელმა ზოგიერთმა უდიდესმა მოთამაშემ წარმოადგინა ამოცანებისა და შეტყობინებების სერია ეკოლოგიურ თემატიკაზე, რომლებიც ინტეგრირებული იქნება ისეთ პოპულარულ თამაშებში, როგორიცაა Angry Birds 2, Golf Clash და Subway Surfers. დამატებები წაახალისებს მოთამაშეებს ებრძოლონ კლიმატის ცვლილებას ან დაიცვან გადაშენების პირას მყოფი მგლები. ეს ინიციატივა არის გაეროს გარემოსდაცვითი პროგრამის (UNEP) პროექტის ნაწილი, რომელიც მიზნად ისახავს თამაშების შემქმნელებთან მუშაობას ჩვენი დროის ყველაზე მნიშვნელოვანი ეკოლოგიური პრობლემების შესახებ ერუდიციის ამაღლების მიზნით.
„ვიდეო თამაშები არის ერთ-ერთი ყველაზე დიდი საკომუნიკაციო საშუალება პლანეტაზე, - ამბობს სემ ბარატი, UNEP-ის განათლებისა და ინფორმაციის გავრცელების განყოფილების ხელმძღვანელი. - ჩვენ მზად ვართ მხარი დავუჭიროთ ამ ინდუსტრიას, რათა წავახალისოთ გეიმერები მიიღონ განათლება, შთავაგონოთ და გავააქტიუროთ უფრო ფართო ეკოლოგიური დღის წესრიგი და ჯერჯერობით, როგორც ჩანს, ეს მუშაობს“.
მსოფლიოში 2,6 მილიარდი ადამიანი თამაშობს ვიდეო თამაშებს. სულ უფრო მეტი მოთამაშე იჩენს ინტერესს გარემოს დაცვის მიმართ. 2019 წლის UNEP-ის ანგარიშში „ვთამაშობთ პლანეტისთვის“ ნათქვამია, რომ ვიდეო თამაშებს შეუძლიათ შთააგონონ მილიარდობით ადამიანი შეიტანონ თავისი წვლილი სოციალურ-ეკოლოგიური პრობლემების გადაჭრაში.
ვიდეო თამაშების ინდუსტრიის წლიური შემოსავალი 140 მილიარდ აშშ დოლარს შეადგენს, რაც მეტია, ვიდრე ჰოლივუდის, ბოლივუდისა და მუსიკალური ჩანაწერების გაყიდვები ერთად აღებული. 2017 წელს 666 მილიონი ადამიანი უყურებდა სხვა ადამიანების თამაშებს YouTube-სა და Twitch-ზე - ეს მეტია, ვიდრე HBO, ESPN და Netflix-ის ერთობლივი აუდიტორია. UNEP-ის მოხსენების თანახმად, ამ ყურადღებისა და ინდუსტრიის შემოსავლების თუნდაც მცირე ნაწილის პლანეტაზე გადატანა დიდ გავლენას მოახდენს რეალურ სამყაროზე.
ვთამაშობთ პლანეტისთვის
კომპანია Space Ape UNEP-ის ალიანსის „ვთამაშობთ პლანეტისთვის“ 25 წევრიდან ერთ-ერთია, რომელმაც გამოიჩინა ინიციატივა გამოიყენოს თამაშების შესაძლებლობები კლიმატის ცვლილებასთან საბრძოლველად ქმედებების წახალისების მიზნით. პროექტმა სტარტი აიღო 2019 წელს და 970 მილიონზე მეტ მოთამაშეს მოიცავდა. ალიანსში გაწევრიანებით, თამაშის შემქმნელები იღებენ ცხოვრების „მწვანე“ წესის ინტეგრირების და მოთამაშეებისთვის დახმარების გაწევის ვალდებულებას, რათა შემცირდეს ემისიები გლობალური ეკოლოგიური დღის წესრიგის მხარდასაჭერად.
ამ წლის დასაწყისში, ალიანსმა უმასპინძლა Green Game Jam-ს, რომელშიც მობილური თამაშების 11 მწარმოებელი კომპანია იბრძოდა შესაძლებლობისთვის შეეტანა ეკოლოგიური ელემენტი მათ ერთ-ერთ არსებულ თამაშში, რითაც მას „მწვანე სტიმული“ მისცა. მიზნები მოიცავდა მოთამაშეების მიერ დაკისრებულ პირად ვალდებულებებს, როგორიცაა ორშაბათობით ხორცზე უარის თქმა, სამსახურში ველოსიპედით სიარული, მწვანე სივრცის, მზის პანელების ან სათამაშოდ ელექტრო მანქანის პროექტირება.
კომპანია Space Ape, რომლის თამაში Transformers: Earth Wars შეიცავს ეკოლოგიურ თემებს ორიგინალური სიუჟეტური ხაზის სახით, აირჩია განახლებადი ენერგიის წყაროების დანერგვის ამოცანა. განახლებულ ვერსიაში, კეთილი და ბოროტი ტრანსფორმერები გაერთიანდნენ, რათა იპოვონ ახალი ტექნოლოგიები დედამიწის ენერგეტიკული რესურსების უფრო მდგრადი გამოყენებისთვის.
მენსა-ბონსუ აღნიშნავს, რომ კომპანიას ასევე სურდა მოთამაშეების მოქმედებისკენ მოწოდება, ამიტომ სთხოვა მათ აეღოთ ვალდებულება შეეცვალათ ნათურები შუქდიოდურ ნათურებზე.
კალიფორნიის კომპანია Pixelberry Studios-მა გაამახვილა ყურადღება კლიმატის ცვლილებაზე მათი თამაშის სათაურში „არჩევანი“ (Choices). თამაში გოგონას შესახებაა, რომელიც დაბრუნდა მშობლიურ სანაპირო ქალაქში, სადაც ბევრი თევზი დაიღუპა. გოგონას უმცროსი და დარწმუნებულია, რომ თევზის დაღუპვა კლიმატის ცვლილებასთანაა დაკავშირებული, მიუხედავად ადგილობრივი პოლიტიკოსებისა და ბიზნესმენების სკეპტიციზმისა. მოთამაშის ამოცანაა დაეხმაროს უმცროს დას სხვების გაერთიანებაში და ცნობიერების ამაღლებაში კლიმატის ცვლილებასთან დაკავშირებით.
სარან უოკერი, Pixelberry თამაშის ერთ-ერთი ავტორი, ამბობს, რომ გუნდმა წაიკითხა ათობით სტატია ახალგაზრდა თაობის შესახებ, რომელიც განიცდის წუხილს კლიმატის ცვლილების გამო. (მილენიელთა ბოლო გამოკითხვის თანახმად, 30 000-მა 30 წლამდე ასაკის ადამიანმა 186 ქვეყნიდან დაადასტურა, რომ კლიმატის ცვლილებისა და ბუნების განადგურების შესახებ ინფორმირებულობა მათი ყველაზე დიდი საზრუნავი იყო.)
„ჩვენ ყველანი ძალიან შთაგონებული ვიყავით გრეტა ტუნბერგის ისტორიით, - თქვა უოკერმა, რომელსაც ახალგაზრდა შვედი ეკოაქტივისტი ჰყავდა მხედველობაში. - კომპანიაში ნებისმიერი ადამიანი, რომელსაც ჰყავს შვილები, დაფიქრდება იმაზე, თუ როგორ სამყაროს დავუტოვებთ ჩვენს შვილებს. გვინდოდა გვეჩვენებინა, რომ ყველას შეუძლია ბევრი რამის გაკეთება“.
ცვლილებები დარგში
სათამაშო ინდუსტრია ასევე განიხილავს ნახშირბადის ნეიტრალურ ან, ზოგიერთ შემთხვევაში, ნახშირბადის პოზიტიურად გახდომის შესაძლებლობას, რაც დიდი ხნის ნანატრი ნაბიჯია იმ სექტორისთვის, რომლის გარემოზე ზემოქმედება გულმოდგინედ იქნა შესწავლილი. ამჟამად ყოველწლიურად 50 მილიონი ტონა ელექტრონული ნარჩენი წარმოიქმნება, 2050 წლისთვის კი, პროგნოზის მიხედვით, ეს რაოდენობა 120 მილიონ ტონას მიაღწევს.
მობილური თამაშების მწარმოებელი კომპანია Supercell-მა ცოტა ხნის წინ აიღო ვალდებულება გახდეს ნახშირისგან ნეიტრალური და მოახდინოს მოთამაშეების მიერ თამაშის დროს გამომუშავებული ნახშირორჟანგის კომპენსირება. კომპანიები Rovio და Space Ape აპირებენ ანალოგიური ქმედებების განხორციელებას.
ალიანსი „ვთამაშობთ პლანეტისთვის“ გაუზიარებს ნახშირბადის გარეშე რეკომენდაციებს თავის წევრებს, ხოლო Sony უხელმძღვანელებს სამუშაო ჯგუფს, რომელშიც შედიან სათამაშო კონსოლების სხვა მწარმოებლები. ალიანსი ხელს შეუწყობს დარგისთვის ნახშირბადის ახალი მრიცხველის და კომპენსაციის საკითხებზე ახალი სახელმძღვანელოს შემუშავებას, აგრეთვე შეიმუშავებს ახალ კოლექტიურ ვალდებულებებს ტყის ლანდშაფტების აღდგენისთვის, რაც ხელს უწყობს ნახშირბადის ემისიების ათვისებას.
„ამ მოგზაურობის დაწყებისას ჩვენ გვინდოდა დავხმარებოდით სხვებსსაც ჩვენს ინდუსტრიაში, - თქვა მენსაჰ-ბონსუმ. - თუ ყველა თავის წვლილს შეიტანს, ჩვენ შევძლებთ შევცვალოთ სამყარო“.
Комментариев нет:
Отправить комментарий
Will be revised